Выстава графікі Мікалая Прадзеіна «Пушкін і Гогаль»

Details

Створана 16.01.2024 09:09

Дырэктар Віцебскай абласной бібліятэкі Таццяна Адамян і дырэктар Дзяржаўнага мемарыяльнага гісторыка-літаратурнага і прыродна-ландшафтнага музея-запаведніка А. С. Пушкіна «Міхайлаўскае» Георгій Васілевіч адкрылі 14 студзеня 2024 года выставу «Пушкін і Гогаль».

На выставе прадстаўлена серыя графічных работ скульптара, графіка і паэта з Екацярынбурга Мікалая Прадзеіна. Мікалай Пятровіч нарадзіўся ў Заураллі, у Курганскай вобласці. У 1986 годзе скончыў Свярдлоўскую вячэрнюю мастацкую школу. З 1997 года М. Прадзеін – член Саюза мастакоў Расіі. Яго работы знаходзяцца ў Дзяржаўным музеі-запаведніку А. С. Пушкіна «Міхайлаўскае» (Пскоўская вобласць), у Музеі Л. Талстога (г. Масква), Тэатральным музеі А. А. Бахрушына (г. Масква) і інш. Прадзеін – аўтар залатой статуэткі «Casta Diva» (Расійская оперная прэмія) і прыза «Дягилев» міжнароднага фестывалю «Дягилевские сезоны. Пермь–Петербург–Париж». Мастак – аўтар ілюстрацый да выдання паэмы М. Гогаля «Мёртвыя душы», якое выйшла ў свет у 2009 годзе ў Маскве да 200-гадовага юбілею пісьменніка. Вершы Мікалая Прадзеіна рэгулярна публікуюцца ў часопісах «Урал» і «Новый мир». Свой альбом «Скульптура. Графика. Фотография. Стихи» аўтар перадаў у дар бібліятэцы. З 2011 года работы мастака рэгулярна ўдзельнічаюць у перасовачных выставачных праектах Пушкінскага Запаведніка ў Расіі, Швецыі, Чэхіі, Германіі, Рэспубліцы Беларусь.

У 2021 годзе Пушкінскі Запаведнік арганізаваў выставу да 70-годдзя мастака. Сёння ў зборы музея-запаведніка звыш трохсот работ Мікалая Пятровіча. Гэта серыі графічных работ «Писатели-сказочники», «Портреты русских писателей», «Писатели», «Бродский», «Гоголиана», а таксама серыі ілюстрацый да твораў А. С. Пушкіна: «Евгений Онегин», «Маленькие трагедии», «Капитанская дочка», «Пиковая дама», «Борис Годунов», «Медный всадник». Выразныя чорна-белыя ілюстрацыі да пушкінскіх твораў былі выкананы ў 2015–2016 гадах. Па словах аўтара, вобразы з'яўляліся на паперы «дастаткова стыхійна, як быццам я іх клікаў – яны адклікаліся, праступаючы на белай паперы лініямі, рыскамі, наплывамі, кляксамі...». Выбраная мастаком тэхніка робіць лінію свабоднай, ліст больш жывым, а персанажаў – больш рухомымі і выразнымі. Гэта выстава нагадвае гледачам пра творчасць А. С. Пушкіна і М. В. Гогаля, пра любімых літаратурных герояў, заахвочвае адкрыць і прачытаць кнігі, якія назаўжды ўвайшлі ў аснову збораў бібліятэк у розных кутках свету. Па задуме стваральнікаў, яна заклікана аб'ядноўваць розныя пакаленні чытачоў у розных гарадах і краінах.

Выстава арганізавана ў рамках пагаднення аб супрацоўніцтве паміж абласной бібліятэкай і Пушкінскім Запаведнікам і прадоўжыцца да 3 сакавіка ў аддзеле літаратуры па мастацтве.