Канікулы ў бібліятэцы – цікава і пазнавальна!

Details

Створана 09.11.2023 09:18

Больш за 450 школьнікаў нашага горада пазнавальна правялі восеньскія канікулы ў Віцебскай абласной бібліятэцы імя У. І. Леніна.

Кожны візіт пачынаўся з агляднай экскурсіі, якая многіх здзівіла ўтульнасцю інтэр'ераў, тэхнічнымі магчымасцямі, колькасцю і разнастайнасцю выданняў у фондзе бібліятэкі.

Розныя аддзелы бібліятэкі прадумалі і прапанавалі свае аўтарскія праекты для некалькіх узроставых катэгорый. Тэматычныя бібліятэчныя мерапрыемствы праходзілі на працягу кожнага дня, далучаючы ўсіх наведвальнікаў да чытання і абмеркавання ўражанняў.

Дзеці даведаліся пра цікавыя факты з гісторыі зараджэння пісьменства, з жыцця стваральнікаў славянскай азбукі Кірыла і Мяфодзія, сталі ўдзельнікамі інтэлектуальнай інтэрактыўнай гульні «Славянская пісьменнасць. Кніга. Бібліятэка», падрыхтаванай аддзелам абанемента.

Дзіцячы і юнацкі аддзелы расказвалі пра гісторыю ўзнікнення, працэс стварэння і віды мультыплікацыі. Дзеці з задавальненнем глядзелі мультфільмы на аснове любімых літаратурных твораў.

Экспазіцыя «Што ні кніга, то дзівоцтва» пазнаёміла наведвальнікаў выставачнай залы «ExLibris» не толькі з рарытэтнымі выданнямі мінулых стагоддзяў на беларускай, рускай і заходнееўрапейскіх мовах, якія можна разглядаць праз вітрыннае шкло. Супрацоўнікі аддзела рэдкай кнігі прадставілі дзецям і падлеткам незвычайныя выданні, якія можна выкарыстоўваць для гульняў і квэстаў.

Падчас краязнаўчай віктарыны «Падарожжа па родным краі» вучні сярэдніх класаў дзяліліся сваімі ведамі і адкрывалі для сябе невядомыя факты пра прыроду, гісторыю, культуру нашага горада і вобласці.

Многія чытачы ўпершыню пачулі гісторыю дзяцінства Еўфрасінні Полацкай дзякуючы батлеечнаму спектаклю «Выбар Прадславы». Прыклад яе асабістага імкнення да чытання і адукацыі адкрыў для іх важныя дэталі яе лёсу і служэння Богу.

На ўроку бяспекі «Азбуку горада памятай заўсёды» школьнікі вывучалі правілы дарожнага руху, на эканамічнай гульні «У госці да Гноміка Эканоміка» даведаліся асноўныя прынцыпы планавання асабістага бюджэту.

Папоўніць багаж ведаў і ўменняў, навучыцца працаваць у новых тэхніках, развіваць фантазію і творчы густ закліканыя майстар-класы ў бібліятэцы.

Старонкі казкі «Спадарыня Злюка» Соні Бугаевай сталі часткай асабістага падарожжа кожнага школьніка падчас інтэрактыўнага чытання кнігі. Дзеці адказвалі на пытанні, прапаноўвалі свае варыянты развіцця падзей у жыцці нязноснай бабулі Спадарыні Злюкі, а потым стваралі выявы герояў на аснове ўражанняў.

Адсвяткавалі чытачы дзень нараджэння знакамітага плюшавага медзведзяня з любімымі героямі казкі «Віні-Пух» Алана Мілна. Як падарунак з бібліятэкі яны забралі з сабой самастойна вырабленага касалапага гарэзу.

Аддзел літаратуры па мастацтве сабраў дзяцей на майстар-клас «Млечны шлях», падчас якога дзеці ўпрыгожвалі крылатага коніка, які ўмее рабіць самыя незвычайныя рэчы.

Пра асаблівасці жыцця насякомых і іх значэнне дзятва даведалася на майстар-класе «Дзіўны свет прыроды».

Вучні малодшых класаў вывучылі персанажаў беларускай міфалогіі, асаблівасці мясцовых легенд і паданняў, на аснове якіх стваралі казачных герояў сваімі рукамі.

Праект «Восеньскія канікулы ў бібліятэцы» стаў важнай падзеяй для ўсіх і будзе працягвацца ў фармаце разнапланавых мерапрыемстваў у перыяд зімовых і вясновых канікулаў.