|
|
|
|
|
 |
 |
Віцебская абласная бібліятэка: 95 гадоў чытаем разам
- Details
- Створана 04.09.2024 08:50
Віцебская абласная бібліятэка імя У. І. Леніна ў рамках святкавання Дня бібліятэк Беларусі плануе 4–15 верасня 2024 года шырокую праграму мерапрыемстваў.
Сучасная бібліятэка прапануе шырокі спектр кніг, часопісаў і іншых матэрыялаў, якія могуць задаволіць інтарэсы і захапленні самых розных людзей. Доступ да электронных кніг, баз даных і іншых анлайн-рэсурсаў зручны для выкарыстання ў любы час і ў любым месцы. Абласная бібліятэка стала пастаянным месцам правядзення розных лекцый, семінараў, майстар-класаў і выставак, якія дазваляюць людзям размаўляць, дзяліцца ведамі і абменьвацца ідэямі, а таксама атрымліваць падтрымку ад аднадумцаў. Гэта асабліва важна для тых, хто шукае натхненне ці хоча развіваць свае праекты.
Праграма прафесійнага свята сёлета пачнецца з прэзентацыі новага мультымедыйнага праекта «Ваенныя дарогі бібліятэкараў Віцебшчыны», які прысвечаны ўкладу работнікаў бібліятэк Віцебскага краю ў набліжэнне Перамогі. У год 80-годдзя вызвалення Беларусі ад нямецка-фашысцкіх захопнікаў успомнім тых, хто ў цяжкія для нашай Радзімы дні стаў на яе абарону, а пасля вызвалення акупаваных тэрыторый дапамагаў аднаўляць бібліятэчную сістэму. 4 верасня ў 12:00 стваральнікі праекта ў інтэрактыўным фармаце пазнаёмяць з электронным рэсурсам і адкажуць на пытанні.
Батлеечны спектакль «Вольга святая» – гэта мастацкае пераасэнсаванне гісторыі, заснаванай на рэальных падзеях Х стагоддзя і дзіўным лёсе княгіні Вольгі – першай кіраўніцы Русі, якая прыняла хрысціянства. 4 верасня ў 15:00 спектакль дапаможа гледачам стаць відавочцамі нараджэння Віцебска, у падмурак якога, як апавядаюць летапісы, заклала першы камень вялікая княгіня. На фоне маляўнічых дэкарацый ажывуць вядомыя героі дахрысціянскай Русі, якія раскажуць гісторыю пра нашых далёкіх продкаў-славян, іх слабасці і сілу духу ў пытанні выбару веры.
Гэтая дзіўная гісторыя мужнасці і стойкасці вялікай жанчыны – княгіні Вольгі – будзе цікавая і дарослым, і дзецям!
5 верасня ў 15:00 запрашаем на адкрыццё персанальнай выставы выцінанкі «Дрэва жыцця» Аксаны Зорынай, члена Беларускага саюза майстроў народнай творчасці. Традыцыйная беларуская тэхніка раскрывае дзіўны свет нашых продкаў і сучаснікаў, які адлюстраваны ў сюжэтах і ўзорах, выразаных без папярэдняй прамалёўкі контураў з аднаго суцэльнага ліста паперы.
На выставе-праглядзе новых паступленняў «Кнігі для восеньскага настрою» ў аддзеле абанемента 9–10 верасня можна не толькі азнаёміцца з навінкамі, але і забраніраваць літаратуру, якая спадабалася.
Аддзел выданняў на замежных мовах запрашае 9 верасня з карысцю і захапленнем правесці час у квэст-пакоі «Егіпецкія пісьмёны». Чытачы змогуць акунуцца ў атмасферу Старажытнага Егіпта, навучыцца чытаць іерогліфы, пазнаёміцца з багіняй пісьма і стаць вучнем егіпецкай школы пісцоў. Усім, хто пройдзе выпрабаванні матэматычнай пірамідай і лабірынтам, адкрыюцца тысячагадовыя сакрэты муміфікацыі і таямніцы часу.
Вечар-успамін «Афганскія дарогі Валерыя Марчанкі» адбудзецца 10 верасня ў 14:00. У гэтым годзе адзначаецца 70-годдзе з дня нараджэння воіна-інтэрнацыяналіста, гвардыі падпалкоўніка, пісьменніка – чалавека, чыё жыццё і творчасць сталі сімвалам мужнасці і адданасці. Гэты вечар стане ўнікальнай магчымасцю пазнаёміцца з жыццём і творчасцю Валерыя Марчанкі, даведацца больш пра яго жыццёвы шлях і ўдзел у ваенных канфліктах, пачуць успаміны тых, хто асабіста ведаў Валерыя Рыгоравіча, і ўшанаваць яго памяць разам з аднадумцамі.
У фае 3-га паверха 10 верасня ў 16:00 адбудзецца адкрыццё персанальнай выставы Таццяны Буевіч «Gouache: пераўтварэнне». З моманту заснавання школы малявання для дарослых «Мастак», якая дзейнічае ў абласной бібліятэцы з верасня 2020 года, Таццяна Уладзіміраўна з'яўляецца пастаянным яе ўдзельнікам. Любімы матэрыял мастачкі – гуаш. У гэтай цікавай і даволі рэдкай тэхніцы выкананы яе работы, у якіх непаўторнае зачараванне знаёмых прадметаў і месцаў, прыцягальная прыгажосць і зменлівая сутнасць самой прыроды. У экспазіцыі прадстаўлены і пейзажы, і нацюрморты, і ўсімі любімыя кветкі.
Усіх наведвальнікаў 11–12 верасня чакае традыцыйна папулярная акцыя «Кніга з рук у рукі» ў фармаце кніжных развалаў, дзе можна выбраць кнігі, атрыманыя Віцебскай абласной бібліятэкай у дар ад чытачоў і жыхароў горада.
Інтэрактыўны квэст «Горад дабра» сумесна з ВГА «Беларускае таварыства інвалідаў па зроку» і ДУСА «Віцебскі дом-інтэрнат для састарэлых і інвалідаў» 11 верасня ў 11:00 дапаможа развіць эмпатыю і разуменне ў адносінах да людзей з абмежаванымі магчымасцямі здароўя. Удзельнікі будуць выконваць заданні з завязанымі вачыма, знаёміцца з рознымі прадметамі, арыентуючыся толькі на гукі, галасы і ўласныя тактыльныя адчуванні, выкарыстоўваць спецыяльныя тэхнічныя прыстасаванні. Запрошаныя спецыялісты падзеляцца вопытам і адкажуць на пытанні.
Выстава «Свет кніжнай закладкі» прадставіць 11 верасня ў 14:00 у выставачнай зале «Ex Libris» унікальную калекцыю Алены Булкінай, прыватнага калекцыянера з в. Зарачча Браслаўскага раёна. Экспазіцыя ўключае больш за 900 кніжных закладак з 35 краін свету і пазнаёміць наведвальнікаў з незвычайным відам мастацтва, якое спалучае ў сабе эстэтыку і функцыянальнасць.
14–15 верасня супрацоўнікі дзіцячага і юнацкага аддзелаў арганізуюць гульнявыя выхадныя «БиблиоДВИЖ» для юных чытачоў і іх бацькоў, якія гатовыя даследаваць свет літаратуры праз квэсты, віктарыны і інтэрактыўныя гульні, заснаваныя на вядомых творах. Гэта не толькі забава, але і магчымасць даведацца больш пра любімыя кнігі і пісьменнікаў, якія дапамогуць умацаваць сувязь паміж бацькамі і дзецьмі праз сумеснае баўленне часу.
Аддзел прававой інфармацыі і электронных рэсурсаў падрыхтаваў для ўдзельнікаў праекта «Правазнайка» бібліятэчны ўрок «Я з кнігай адкрываю свет», а для першакурснікаў універсітэта «МІПСА» па спецыяльнасці «Правазнаўства» – экскурсію «Лепш усё ўбачыць на свае вочы».
На працягу бібліятэчнай дэкады можна наведаць экскурсію «Свет паміж старонак» і прыняць удзел у рабоце «Майстэрні ката Фаліянта» ў выставачнай зале «Ex Libris», праверыць веды падчас book-экспедыцыі «Раскрываем таямніцы міфічнага свету», пагартаць кнігі з аўтографамі ў падарунак бібліятэцы і навучыцца новым карысным навыкам на майстар-класах.
Усе праекты даступныя для чытачоў з абмежаванымі магчымасцямі здароўя: ім дапамогуць кнопка выкліку персаналу, пандус, супрацьслізготная плітка, тактыльная навігацыя для карыстальнікаў са слабым зрокам.
Прыходзьце ў Віцебскую абласную бібліятэку імя У. І. Леніна ў любы дзень. Тут заўсёды цікава!
