|
|
|
|
|
 |
 |
Маналогі стагоддзяў
- Details
- Створана 14.01.2016 08:30
Бібліятэкі вельмі часта называюць скарбніцамі нацыянальнай культуры і гэта сапраўды так – бо ўсё, што многія стагоддзі захоўвалася ў народнай памяці, знаходзіла адлюстраванне ў кнігах, а кнігі збіраліся ў кніжныя калекцыі – бібліятэкі. Беларусь – краіна з багатай старажытнай кніжнай культурай. Менавіта выхадзец з беларускіх зямель Францыск Скарына надрукаваў кірылічным шрыфтам першую для ўсходніх славян кнігу «Біблію». Яшчэ ў пачатку другога тысячагоддзя на беларускіх землях былі створаны першыя бібліятэкі, фонды якіх папаўняліся на працягу стагоддзяў і, на жаль, часта знішчаліся. Пра шматлікія з іх знішчылася нават памяць. Таму многія спецыялісты вядуць адлік гісторыі бібліятэк і кніжнай справы з кастрычніцкіх падзей 1917 года.
Паважаныя чытачы, мы прапануем вам разам з намі прасачыць гісторыю самай буйной і значнай бібліятэкі Беларусі на працягу ХІ–ХІV стагоддзяў – бібліятэкі Полацкага Сафійскага сабора. А таксама пазнаёміцца з жыццём і дзейнасцю асветніцы Беларусі Еўфрасінні Полацкай. Дакрануцца да друкаванага слова Францыска Скарыны і зазірнуць у Музей беларускага кнігадрукавання ў Полацку. Прасачыць дзейнасць аднаго з паслядоўнікаў Скарыны – Спірыдона Собаля. Пазнаёміцца з кніжнай спадчынай Беларусі і рэдкімі выданнямі, якія знаходзяцца ў фондах Віцебскай абласной бібліятэкі.
Да 950-годдзя бібліятэкі Полацкага Сафійскага сабора супрацоўнікамі аддзела краязнаўчай літаратуры і бібліяграфіі на працягу года будзе падрыхтаваны цыкл выстаў пад назвай «Маналогі стагоддзяў»:
«Дзе Сафія плыве над зямлёю»: да 950-годдзя бібліятэкі Полацкага Сафійскага сабора
«Святая апякунка Беларусі»: прысвечаная Еўфрасінні Полацкай
«Святло друкаванага слова»: кніжная спадчына Францыска Скарыны
«Паслядоўнікі славутага Скарыны»: прысвечаная 385-годдзю з часу выхаду ў свет «Буквара» Спірыдона Собаля
«Да кніжных скарбаў дакраніся»: прысвечаная кніжнай спадчыне Беларусі
«Дакрануцца да гісторыі»: прысвечаная выданням рэдкага фонду Віцебскай абласной бібліятэкі
