Творчы вечар Вольгі Русілкі «Выберы сабе адзін радок»

Details

Створана 19.09.2024 10:33

17 верасня ў бібліятэцы адбыўся юбілейны творчы вечар паэткі, празаіка, літаратуразнаўцы Вольгі Русілкі «Выберы сабе адзін радок».

Вольга Русілка – кандыдат філалагічных навук, дацэнт, педагог, член Саюза пісьменнікаў Беларусі, аўтар зборнікаў паэзіі «Табе» (1996), «Ажына» (2004), «B.I.P» (2009), «Сцежка, сцежачка, сцяжынка» (2013) і 200 навуковых, літаратурна-крытычных, навучальных, метадычных публікацый, манаграфій. Суаўтар падручніка «Беларуская літаратура. 8 клас». Лаўрэат літаратурных прэмій імя Уладзіміра Караткевіча і Петруся Броўкі Віцебскага аблвыканкама.

На пачатку сустрэчы Вольга Іванаўна адзначыла, наколькі блізкім для яе з'яўляецца Дзень народнага адзінства, бо сама яна – ураджэнка Гродзеншчыны, родная вёска Бершты знаходзіцца на мяжы Беларусі і Літвы.

Лёс звязаў Вольгу Русілку з Віцебшчынай, каля сарака гадоў прысвяціла яна выкладчыцкай працы ў Віцебскім дзяржаўным універсітэце. А адразу пасля заканчэння Беларускага дзяржаўнага ўніверсітэта Вольга Іванаўна працавала настаўніцай беларускай мовы і літаратуры ў сярэдняй школе № 25 г. Віцебска. Яе былая вучаніца, а потым і студэнтка, настаўніца беларускай мовы і літаратуры сярэдняй школы № 12 Жанна Дадэркіна з цеплынёй ўзгадала і першае знаёмства з Вольгай Русілкай, і гады студэнцтва, і тыя добрыя адносіны, што працягваюцца да сённяшняга дня. А яе падарункам стала песня на верш Вольгі Русілкі, што Жанна Віктараўна выканала «а капэла». Яскравым і цёплым таксама было выступленне настаўніцы беларускай мовы і літаратуры гімназіі № 7 г. Віцебска, паэткі Алены Гінько. Члены Віцебскага абласнога аддзялення Саюза пісьменнікаў Беларусі, паэты Алена Крыклівец і Мікалай Намеснікаў адзначылі не толькі паэтычны талент Вольгі Русілкі, але і яе дабрыню, спагаду, увагу да тых, хто побач.

На відэастаронках «Старога альбома», зробленага Фёдарам Грынеўскім, усе прысутныя зноў пабачылі знаёмыя постаці віцебскіх паэтаў і пісьменнікаў, прадстаўнікоў творчай інтэлігенцыі, выкладчыкаў універсітэта, разам з якімі Вольга Русілка правяла нямала літаратурных вечарын.

Вольга Іванаўна пазнаёміла ўсіх са сваімі паэтычнымі і празаічнымі творамі, апублікаванымі нядаўна ў часопісах «Маладосць» і «Полымя», прачытала вершы, што даўно ўпадабалі чытачы. Адкрыццём для многіх з прысутных стаў музычны талент Вольгі Русілкі. Яе песню «Гэта восень», аранжыроўку якой зрабіў Валерый Дамарацкі, калісьці выконвалі ўдзельнікі вакальнай студыі «Шанс». На вечары быў паказаны відэакліп з гэтай песняй. Вядомы беларускі музыказнаўца, кампазітар Аліна Безенсон уключыла цыкл песень на вершы Вольгі Русілкі ў свой зборнік вакальных твораў «Мой звонкаспеўны край».

Свае добрыя пажаданні Вользе Іванаўне выказалі выкладчыкі і студэнты Віцебскага дзяржаўнага ўніверсітэта, настаўнікі беларускай мовы і літаратуры школ горада, вучні, супрацоўнікі бібліятэкі.