Размова пра страхаванне ў праекце «Лабараторыя поспеху: ад ідэі да бізнесу»
- Details
- Створана 05.04.2024 12:15
Чарговая сустрэча праекта «Лабараторыя поспеху: ад ідэі да бізнесу» 4 красавіка ў бібліятэцы пачалася з тэматычнага квіза з пытаннямі пра гісторыю ўзнікнення страхавой справы і цікавыя факты, звязаныя са страхаваннем.
У рамках выканання рэспубліканскага плана мерапрыемстваў па правядзенні ў 2024 годзе Года якасці супрацоўнікі агульнай чытальнай залы прапанавалі навучэнцам сярэдняй школы № 11 г. Віцебска імя М. М. Бахціна акунуцца ў атмасферу працы страхавых арганізацый. Спікерам на сустрэчы са старшакласнікамі выступіла дырэктар Прадстаўніцтва па г. Віцебску Беларускага рэспубліканскага ўнітарнага страхавога прадпрыемства «Белдзяржстрах» Аксана Мусатава.
Яна расказала, што адна з вядучых страхавых арганізацый у Беларусі была заснаваная ў 1921 годзе і ў філіялах па ўсёй краіне прапануе кліентам шырокі спектр відаў добраахвотнага і абавязковага страхавання. Школьнікі даведаліся, што гэтыя фінансавыя інструменты – не толькі бізнес, але і сацыяльная адказнасць, якая дапамагае людзям і арганізацыям абараняць сябе ад непрадбачаных сітуацый і мінімізаваць іх наступствы.
Аксана Вітальеўна прыемна ўразіла сваім прафесіяналізмам і адкрытасцю да дыялогу. Яе аповяд пра накірункі развіцця кампаніі і падыходы да страхавання быў не толькі пазнавальным, але і займальным. Абласная бібліятэка зноў дала падлеткам унікальную магчымасць паразмаўляць з прафесіяналамі сваёй справы і задаць пытанні, якія іх цікавяць.
На памяць пра сустрэчу ў вучняў засталася карысная інфармацыя і фірменная друкаваная прадукцыя. Праект «Лабараторыя поспеху: ад ідэі да бізнэсу» працягваецца! У перспектыве – новыя сустрэчы ў бібліятэцы!