IX навукова-практычная канферэнцыя «Віцебскі край», прысвечаная 85-годдзю ўтварэння Віцебскай вобласці

Details

Створана 28.11.2023 07:15

IX навукова-практычная канферэнцыя «Віцебскі край», прысвечаная 85-годдзю ўтварэння Віцебскай вобласці, адбылася 23 лістапада ў Віцебскай абласной бібліятэцы.

Больш за 70 гісторыкаў, археолагаў, архівістаў, настаўнікаў, супрацоўнікаў музеяў і бібліятэк, краязнаўцаў з розных гарадоў Беларусі і Расіі падзяліліся вынікамі сваіх даследаванняў у вочным фармаце.

Арганізатарамі канферэнцыі выступілі Віцебская абласная бібліятэка імя У. І. Леніна, Інстытут гісторыі Нацыянальнай акадэміі навук Беларусі, Віцебскі абласны краязнаўчы музей.

На ўрачыстым адкрыцці канферэнцыі з прывітальным словам да ўдзельнікаў звярнуліся старшыня Віцебскага гарадскога Савета дэпутатаў Уладзімір Бялевіч, галоўны спецыяліст упраўлення культуры Віцебскага абласнога выканаўчага камітэта Дзяніс Юрчак, дырэктар Віцебскай абласной бібліятэкі Таццяна Адамян, дырэктар Інстытута гісторыі Нацыянальнай акадэміі навук Беларусі Вадзім Лакіза (відэапрывітанне), намеснік дырэктара Віцебскага абласнога краязнаўчага музея Аксана Ісачанка.

Пленарнае пасяджэнне канферэнцыі адкрыў відэадаклад «Образование Витебской области» прафесара кафедры сацыяльна-гуманітарных і прававых дысцыплін Гомельскага дзяржаўнага тэхнічнага ўніверсітэта імя П. В. Сухога, доктара гістарычных навук Сяргея Елізарава. З дакладамі выступілі вядучы навуковы супрацоўнік аддзела археалогіі першабытнага грамадства Інстытута гісторыі НАН Беларусі, кандыдат гістарычных навук, дацэнт Вадзім Шадыра, галоўны спецыяліст упраўлення культуры Віцебскага аблвыканкама, кандыдат гістарычных навук, дацэнт Дзяніс Юрчак. Загадчык аддзела дзяржаўнага ўліку і навукова-даведачнага апарату Беларускага дзяржаўнага архіва кінафотафонадакументаў Марыя Раманава расказала пра аўдыявізуальныя дакументы пра Віцебскую вобласць, якія захоўваюцца ў фондах архіва, і прадэманстравала дакументальную стужку, прысвечаную вызваленню Віцебшчыны і першым гадам пасляваеннага аднаўлення.

Плённа прайшла работа секцый «Гістарычнае краязнаўства. Віцебскі край ад старажытнасці да 1917 г.», «Гістарычнае краязнаўства. Віцебскі край з 1918 г. да сучаснасці», «Гістарычнае краязнаўства. Вялікая Айчынная вайна», «Краязнаўства ў сістэме гуманітарных навук».

Па выніках канферэнцыі будзе выдадзены аднайменны зборнік матэрыялаў.