|
|
 |
 |
Выстава «Кніга адзначае юбілей»
- Details
- Створана 01.07.2026 08:06
Кнігі – дзіўнае тварэнне чалавечага розуму, таленту, працавітасці. Яны таксама святкуюць свае юбілеі. У 2026 годзе больш за сотню кніг вялікіх пісьменнікаў усяго свету адзначаюць круглую дату. Значыць, з'явілася нагода яшчэ раз прачытаць любімы твор і захапіцца талентам аўтара.
На выставе «Кніга адзначае юбілей» у аддзеле рэдкай кнігі экспануюцца выданні, якія сёлета адзначаюць розныя даты сваей кніжнай біяграфіі: выхаду ў свет, першых публікацый і завяршэння работы над імі.
705 гадоў спаўняецца з часоў стварэння Дантэ Аліг'еры «La Commedia» (мініяцюрнае выданне, 1983 г.). Гэты твор з'яўляецца паэтычнай энцыклапедыяй сярэднявечнага светасузірання. Праца Дантэ была перакладзена на мноства моў, дала глебу для стварэння шматлікіх твораў мастацтва.
Яшчэ адно мініяцюрнае выданне ў экспазіцыі – пушкінская «Капітанская дачка» – адзначае 190 гадоў з моманту першай публікацыі. Нягледзячы на тое, што па аб'ёме кніга больш нагадвае аповесць, «Капітанскую дачку» прынята адносіць да жанру гістарычнага рамана. Гэта самы папулярны твор Аляксандра Пушкіна сярод замежных чытачоў, які перакладзены больш чым на 50 моў.
195 гадоў таму выйшаў у свет самы вядомы твор Аляксандра Грыбаедава – камедыя «Гора ад розуму». Гэта бліскуча рыфмаваная сатыра на арыстакратычнае маскоўскае грамадства першай паловы XIX стагоддзя, напісаная ў афарыстычным паэтычным стылі. На выставе прадстаўлена факсіміле выдання 1913 года ў альбомным фармаце.
У 2026 годзе спаўняецца 150 гадоў з дня публікацыі рамана Марка Твэна «Прыгоды Тома Соера», які стаў класікай сусветнай дзіцячай літаратуры. У аддзеле рэдкай кнігі захоўваецца арыгінальны томік рамана, надрукаваны ў 1903 годзе ў ЗША.
Калі хтосьці з юбіляраў вам яшчэ не знаёмы, то ў вас ёсць выдатная нагода прыйсці ў бібліятэку, каб пазнаёміцца і пасябраваць з кнігай.
Выстава «Кніга адзначае юбілей» працуе ў аддзеле рэдкай кнігі з 1 па 31 ліпеня.
