|
|
 |
 |
Савет дырэктараў «Бібліятэкі ў інфармацыйным грамадстве: генерацыя лічбавых рэсурсаў і культурных сэнсаў»
- Details
- Створана 12.12.2025 12:09
Савет дырэктараў публічных бібліятэк Віцебскай вобласці «Бібліятэкі ў інфармацыйным грамадстве: генерацыя лічбавых рэсурсаў і культурных сэнсаў» адбыўся 11 снежня. Гасцямі абласной бібліятэкі і ўдзельнікамі семінара ў гэты дзень сталі прадстаўнікі Нацыянальнай бібліятэкі Беларусі.
Адкрыла мерапрыемства дырэктар Віцебскай абласной бібліятэкі Таццяна Адамян. Намеснік генеральнага дырэктара Нацыянальнай бібліятэкі Беларусі – дырэктар па ідэалогіі, сацыякультурнай і выдавецкай дзейнасці Людміла Высоцкая, якая з'яўляецца куратарам Віцебскай абласной бібліятэкі і публічных бібліятэк Віцебскай вобласці, звярнуўшыся да ўдзельнікаў з прывітальным словам, падкрэсліла ролю падобных сустрэч і абазначыла планы далейшага ўзаемадзеяння.
Загадчык навукова-даследчага аддзела бібліятэказнаўства Нацыянальнай бібліятэкі Беларусі Ірына Кукета пазнаёміла калег з метадычнымі распрацоўкамі Нацыянальнай бібліятэкі Беларусі ў дапамогу публічным бібліятэкам Рэспублікі. Загадчык сектара фарміравання лічбавых калекцый аддзела фарміравання электроннай бібліятэкі Аксана Буйчык распавяла пра электронныя калекцыі Нацыянальнай бібліятэкі. На пасяджэнні абмяркоўваліся таксама актуальныя пытанні бібліятэчнай статыстыкі і ўліку, удзелу ў прафесійных конкурсах, аблічбоўкі выданняў і камплектавання фондаў, былі падведзены вынікі абласнога конкурсу краязнаўчых электронных рэсурсаў публічных бібліятэк Віцебшчыны.
Савет дырэктараў стаў не толькі рабочай пляцоўкай для прафесійных зносін, але і значным укладам у справу захавання гістарычнай спадчыны Вялікай Перамогі. Знакавай падзеяй сустрэчы стала выступленне Уладзіміра Цярэнцьева, члена Апякунскага савета Фонду захавання гістарычнай памяці імя Маршала Савецкага Саюза І. Х. Баграмяна, які прэзентаваў унікальны альбом «Маршал Баграмян». Выданне змяшчае рэдкія фатаграфіі, дакументы і матэрыялы, якія раскрываюць жыццёвы шлях выбітнага палкаводца і яго ваенныя заслугі. Альбомы перададзены ў фонды бібліятэк вобласці.
Пасяджэнне завяршылася культурнай праграмай – паказам спектакля «Дары сэрца» батлеечнага тэатра абласной бібліятэкі.
