|
|
 |
 |
Абласны конкурс краязнаўчых электронных рэсурсаў публічных бібліятэк, прысвечаны 80-годдзю Перамогі ў Вялікай Айчыннай вайне
- Details
- Створана 12.12.2025 11:52
Сучасныя бібліятэкі даўно ўжо выйшлі за рамкі традыцыйнага кнігазахавання. Каб ісці ў нагу з часам трэба ўмець адаптавацца і ўсё больш актыўна працаваць у лічбавай прасторы. Адзін з важных крокаў у гэтым напрамку – стварэнне бібліятэкамі ўласных электронных рэсурсаў, у першую чаргу, краязнаўчых.
У пачатку 2025 года Віцебская абласная бібліятэка аб'явіла пра правядзенне абласнога конкурсу краязнаўчых электронных рэсурсаў публічных бібліятэк, прысвечанага 80-годдзю Перамогі ў Вялікай Айчыннай вайне, у чатырох намінацыях: «Спадчына», «Слаўныя імёны Віцебшчыны», «Багацце Прыдзвінскага краю», «Старонкі ваенных гадоў». Заснавальнікамі і арганізатарамі конкурсу выступілі ўпраўленне культуры Віцебскага абласнога выканаўчага камітэта, Віцебская абласная арганізацыя Беларускага прафсаюза работнікаў культуры, інфармацыі, спорту і турызму і Віцебская абласная бібліятэка імя У. І. Леніна.
Абласны конкурс праводзіўся з мэтай умацавання грамадзянска-патрыятычнай свядомасці, папулярызацыі краязнаўчых ведаў, стварэння ўмоў для самарэалізацыі і развіцця творчага патэнцыялу бібліятэкараў Віцебскай вобласці.
У конкурсе прынялі ўдзел бібліятэкі з 19 раёнаў вобласці. Некаторыя прадстаўлялі свае конкурсныя работы ў некалькіх намінацыях, што не супярэчыла ўмовам конкурсу. Бібліятэчная сістэма Віцебскага раёна – адзіная прадставіла працу сельскіх бібліятэк. Усяго на конкурс было прадстаўлена 24 работы – кожная з іх стала адлюстраваннем творчага падыходу, старанняў і шчырай любові да роднага краю.
Абсалютная большасць конкурсных работ была прысвечана памятным падзеям Вялікай Айчыннай вайны, што абумоўлена святкаваннем у 2025 годзе 80-годдзя Перамогі. Таксама былі прадстаўлены віртуальныя выставы і экскурсіі, інтэрактыўныя карты і праекты, базы даных і аўдыягіды, гульнятэкі, прысвечаныя гісторыі, культуры, людзям і традыцыям рэгіёнаў.
Хочацца адзначыць, што ўсе падрыхтаваныя ў рамках конкурсу рэсурсы – гэта вынік сістэматычнай і карпатлівай працы, якая на працягу многіх гадоў вядзецца ў бібліятэках вобласці.
Членамі журы абласнога конкурсу выступілі кампетэнтныя спецыялісты ўпраўлення культуры Віцебскага аблвыканкама, абласной бібліятэкі, Віцебскай абласной арганізацыі профільнага прафсаюза, дзяржаўнага архіва Віцебскай вобласці, абласнога краязнаўчага музея.
Вынікі конкурсу былі падведзены ў рамках пасяджэння Савета дырэктараў публічных бібліятэк Віцебскай вобласці, якое адбылося 11 снежня ў абласной бібліятэцы. Пераможцы конкурсу, адзначаныя дыпломам І ступені, выступілі з дакладамі.
Пераможцамі конкурсу сталі:
1. У намінацыі «Спадчына»:
I ПРЭМІЯ: Электронны рэсурс «Пра што раскажуць назвы вуліц» цэнтральнай гарадской бібліятэкі імя М. Горкага ДУ «ЦБС г.Віцебска»;
II ПРЭМІЯ: База даных мемарыяльных аб'ектаў і воінскіх пахаванняў «Месцы памяці Талачыншчыны» Талачынскай цэнтральнай раённай бібліятэкі ДУК «Талачынская ЦБС»;
III ПРЭМІЯ: База даных «Памяць пра мінулае і сучаснасць» раённай бібліятэкі ДУК «Расонская ЦБС».
2. У намінацыі «Слаўныя імёны Віцебшчыны»:
I ПРЭМІЯ: Электронны рэсурс «Бешанковічы літаратурныя» Бешанковіцкай цэнтральнай раённай бібліятэкі ДУК «Бешанковіцкая ЦБС»;
II ПРЭМІЯ: Віртуальны праект «Помнім кожнае імя...: настаўнікі і вучні Альгоўскай школы – удзельнікі Вялікай Айчыннай вайны» філіяла «Альгоўская сельская бібліятэка» ДУК «Віцебская РЦБС»;
III ПРЭМІЯ: База даных «Навапалачане – удзельнікі Вялікай Айчыннай вайны» цэнтральнай бібліятэкі імя У. Маякоўскага ДУК «ЦБС г. Наваполацка».
3. У намінацыі «Багацце Прыдзвінскага краю»:
I ПРЭМІЯ: Электронны рэсурс «Лёзненшчына вядомая і невядомая» цэнтральнай раённай бібліятэкі ДУК «Лёзненская ЦБС»;
II Прэмія: Віртуальная гульнятэка «Гарадок у пытаннях: інтэлектуальныя прыгоды» Гарадоцкай цэнтральнай раённай бібліятэкі ДУК «Гарадоцкі культурна-асветніцкі цэнтр і сетка публічных бібліятэк»;
III ПРЭМІЯ: Электронны рэсурс «Пазнай Глыбоччыну – і ты яе палюбіш!» Глыбоцкай цэнтральнай раённай бібліятэкі ДУК «Глыбоцкая ЦБС».
4. У намінацыі «Старонкі ваенных гадоў»:
I ПРЭМІЯ: База даных «Прарыў Перамогі. Прарыў у неўміручасць» Ушацкай раённай бібліятэкі імя Е.Я. Лось ГУК «Ушацкая ЦБС»;
II ПРЭМІЯ: База даных «Героі святой вайны» цэнтральнай раённай бібліятэкі ДУК «Шаркаўшчынская ЦБС»;
III ПРЭМІЯ: Электронны рэсурс «Памяць вогненных гадоў» цэнтральнай раённай бібліятэкі ДУК «Чашніцкая РЦБС».
