Антаніна Маісеева. Людміла Вакар. Інсітнае мастацтва Віцебшчыны

Details

Створана 16.12.2022 08:50

15 снежня ў бібліятэцы адбылося адкрыццё мастацкай выставы члена народнага клуба мастакоў-аматараў «Контур» Антаніны Маісеевай і прэзентацыя альбома аўтара-ўкладальніка Людмілы Вакар «Антаніна Маісеева. Жыццё ў карцінках: жывапіс, графіка, успаміны, вершы».

Творчасць Антаніны Маісеевай добра вядома аматарам інсітнага мастацтва як у нашай краіне, так і за яе межамі. Карціны мастачкі захоўваюцца ў музеях і прыватных калекцыях у розных краінах свету. На выставе ў абласной бібліятэцы прадстаўлены маляўнічыя краявіды Віцебска, партрэты хатніх жывёл, сцэнкі з жыцця, зімовыя забавы. У асноўным гэта работы апошніх двух гадоў. У час прэзентацыі Антаніна Максімаўна расказала прысутным гісторыі з'яўлення некаторых сваіх карцін.

Значнай падзеяй інсітнага мастацтва Беларусі стаў выхад у свет альбома пад укладаннем Людмілы Вакар «Антаніна Маісеева. Жыццё ў карцінках: жывапіс, графіка, успаміны, вершы». Мастацтвазнаўца Людміла Вакар, зрабіўшы экскурс у гісторыю развіцця інсітнага мастацтва, падкрэсліла ўнікальнасць і непаўторнасць таленту Антаніны Маісеевай, адзначыла, што Антаніна Маісеева – адзін з найбольш яркіх сучасных самадзейных мастакоў Беларусі.

Выстава будзе дзейнічаць да 15 студзеня.