Вечар-прэзентацыя «У абдымках казачных фантазій»

Details

Створана 16.11.2022 14:50

15 лістапада ў бібліятэцы адбыўся вечар-прэзентацыя «У абдымках казачных фантазій» мастака-ілюстратара Алены Сянько і пісьменніцы Стасі Наркевіч (Анастасіі Лазебнай).

Гэты творчы дуэт склаўся даўно: Алена Сянько рабіла ілюстарцыі да кніг-размалёвак «Віялета, бабулечка і чароўны дроцік», «Дзіўныя здарэнні на неверагоднай планеце», «Як Васілёк выратаваў каралеўства».

У гэтым годзе ў свет выйшла новая кніга Стасі Наркевіч «Казачная скарбонка», куды ўвайшлі 10 казак, сцэнарый і п'еса, мастаком-афарміцелем якой стала Алена Сянько, а адну з ілюстрацый да казкі «Прыгоды сонечнага зайкі» стварыла мастак-аматар Наталля Трашкова.

Цудоўныя ілюстрацыі, якія аздобілі актавую залу бібліятэкі, адразу прыцягнулі ўвагу гасцей вечарыны. Гэта першая персанальная выстава Алены Сянько як мастака-ілюстратара. Казачныя вобразы, створаныя ёй, дакладна перадаюць асобы казачных персанажаў, іх настрой, прыцягваюць увагу гледачоў сваёй маляўнічасцю. Стася Наркевіч, натхнёная цудоўнымі малюнкамі, зрабіла на іх аснове карціны ў тэхніцы батыку. Загадчык аддзела літаратуры па мастацтве Алена Васілеўская, расказаўшы прысутным пра Алену Сянько, якая працуе ў Віцебскім дзяржаўным каледжы культуры і мастацтваў, звярнула ўвагу ўдзельнікаў вечара на асаблівасці работ мастачкі. А невялікае інтэрв'ю, якое ўзяла ў Алены Сянько і Стасі Наркевіч вядучая вечара-прэзентацыі, загадчык аддзела краязнаўства Ларыса Рагачова, дапамагло больш даведацца пра творчае супрацоўніцтва мастака і пісьменніка.

Вядучы майстар сцэны Беларускага тэатра «Лялька» Юрась Франкоў прачытаў казку «Павучок і лён» з кнігі «Казачная скарбонка». А Стася Наркевіч зрабіла ўсім прысутным цудоўны сюрпрыз, разыграўшы ў літаратурнай латарэі неверагодныя вырабы, выкананыя ёй у тэхніцы батыку.

Віншаванні і падзякі за сапраўднае свята мастацтва і беларускага слова гучалі ў адрас Алены Сянько і Стасі Наркевіч ад паэтэс Галіны Сіняковай, Наталлі Салаўёвай, прадстаўнікоў пярвічнай арганізацыі ветэранаў жаночага руху г. Віцебска, усіх удзельнікаў вечара-прэзентацыі.

Выстава ілюстрацый Алены Сянько будзе працаваць на трэцім паверсе бібліятэкі на працягу месяца.