Завочнае падарожжа для вучняў "Беларусь – старонка родная"

Details

Created on Wednesday, 13 October 2010 10:26

9 кастрычніка 2010 года супрацоўнікі аддзела беларускай літаратуры Баталка І .І. і Собалева В. М. здзейснілі завочнае падарожжа па краіне Беларусь для вучняў 7–9 класаў СШ № 25 г. Віцебска.

Каля 200 школьнікаў апынуліся ў чароўным свеце айчыннай прыгажосці. Свой расповед пра бясцэнную каштоўнасць запаведных мясцін, маляўнічасць натуральных і культурных ландшафтаў блакітнай краіны бібліятэкары суправаджалі кадрамі электроннай прэзентацыі. Фотаздымкі з альбомаў вядомых на Беларусі аўтараў Ігара Бышнёва, Міхася Раманюка, Анатоля Кляшчука і Сяргея Плыткевіча гарманічна дапаўнялі бібліяграфічны агляд.

Мастацкае фота – цудоўны сродак, які дапамагае паўней адчуць веліч краіны, атрымаць асалоду ад відарысаў прыродных багаццяў Беларусі. Менавіта прыгажосць роднай краіны з’яўляецца вытокам натхнення для стварэння паэтычных вобразаў, малявання карцін, нараджэння музычных кампазіцый…

На тэрыторыі нашай рэспублікі дзейнічаюць чатыры Нацыянальныя паркі : Белавежская пушча, Нарачанскі, Прыпяцкі і Браслаўскія азёры. Заўсёды душу перапаўняе пачуццё гонару, што на нашай зямлі яшчэ захаваліся першабытныя куточкі, дзе рэдка ступала нага чалавека. Беражлівыя адносіны да прыроды – асноўны абавязак кожнага грамадзяніна Беларусі. Менавіта гэтая думка была лейтматывам сустрэчы пад назвай “Беларусь – старонка родная”.