Міжабласны семінар «Краязнаўчая дзейнасць бібліятэк як аснова гістарычнага і патрыятычнага выхавання»

Details

Створана 01.04.2022 14:13

30–31 сакавіка ў бібліятэцы прайшоў міжабласны семінар «Краязнаўчая дзейнасць бібліятэк як аснова гістарычнага і патрыятычнага выхавання» і пасяджэнне Савета дырэктараў публічных бібліятэк Віцебскай вобласці, прымеркаваныя да Года гістарычнай памяці.

Адкрыла семінар дырэктар Віцебскай абласной бібліятэкі імя У. І. Леніна Таццяна Адамян.

З прывітальным словам да ўдзельнікаў семінара звярнулася намеснік начальніка ўпраўлення – начальнік аддзела работы арганізацый сферы культуры Віцебскага абласнога выканаўчага камітэта Галіна Баркевіч.

З дакладам аб формах, метадах, дасягненнях і перспектывах краязнаўчай дзейнасці бібліятэк Віцебскай вобласці выступіў кандыдат гістарычных навук, дацэнт, настаўнік гісторыі Віцебскага кадэцкага вучылішча Мікалай Півавар.

Удзельнікам семінара быў прэзентаваны мультымедыйны праект «Вызваленне Віцебшчыны. 1943–1944», які стаў пераможцам рэспубліканскага конкурсу Міністэрства культуры Рэспублікі Беларусь на лепшы культурны праект патрыятычнай тэматыкі ў намінацыі «Лепшы інтэрактыўны бібліятэчны праект патрыятычнай тэматыкі».

На семінары абмяркоўваліся пытанні развіцця краязнаўчай дзейнасці бібліятэк на аснове выкарыстання сучасных інфармацыйных тэхналогій.

Вопытам стварэння і выкарыстання краязнаўчых баз даных, электронных краязнаўчых рэсурсаў падзяліліся вучоны сакратар Магілёўскай абласной бібліятэкі імя У. І. Леніна Юлія Касцюк, галоўны бібліятэкар аддзела краязнаўства Гомельскай абласной універсальнай бібліятэкі імя У. І. Леніна Ніна Серыкава і загадчык аддзела краязнаўства Гродзенскай абласной навуковай бібліятэкі імя Я. Ф. Карскага Алена Кучынская.

Пра работу аддзела рэдкай кнігі і музейна-архіўнай краязнаўчай дзейнасці расказала дырэктар Брэсцкай абласной бібліятэкі імя М. Горкага Алена Стрыжэвіч.

Памочнік намесніка старшыні Віцебскага абласнога выканаўчага камітэта Сяргей Фадзеенкаў прадставіў цікавы даклад «У пошуках страчанай спадчыны: з гісторыі страчаных праваслаўных храмаў Віцебска».

Вопытам краязнаўчай і пошукава-даследчай дзейнасці падзяліліся загадчык аддзелам бібліятэчнага маркетынгу і сацыякультурнай дзейнасці Дубровенскай цэнтральнай раённай бібліятэкі Надзея Дударава, дырэктар Глыбоцкай цэнтралізаванай бібліятэчнай сістэмы Валянціна Спасібёнак, бібліятэкар I катэгорыі Курынскай сельскай бібліятэкі Віцебскай раённай цэнтралізаванай бібліятэчнай сістэмы Марыя Карновіч, загадчык аддзела па рабоце з дзецьмі Лёзненскай цэнтральнай раённай бібліятэкі Вольга Пячонава.

У рамках семінара адбылося ўзнагароджанне пераможцаў абласнога этапа ХХХ рэспубліканскага конкурсу «Бібліятэка – цэнтр нацыянальнай культуры». 9 бібліятэк узнагароджаны дыпломамі першай, другой і трэцяй ступені.