|
|
|
|
|
 |
 |
Падвядзенне вынікаў конкурсу «Зямля пад белымі крыламі»
- Details
- Створана 01.12.2020 11:09
30 лістапада ў Віцебскай абласной бібліятэцы адбылося падвядзенне вынікаў і ўзнагароджанне пераможцаў абласнога конкурсу прэзентацыйных відэаматэрыялаў «Зямля пад белымі крыламі», прысвечанага Году малой радзімы.
У правядзенні конкурсу бібліятэку падтрымала Віцебская абласная арганізацыя Беларускага прафесійнага саюза работнікаў культуры, інфармацыі, спорту і турызму. Старшыня журы конкурсу, дырэктар Віцебскай абласной бібліятэкі Таццяна Адамян расказала пра геаграфію ўдзельнікаў конкурсу, тэматыку прадстаўленых работ.
«Зямлёй пад белымі крыламі» ўзнёсла назваў Беларусь пісьменнік Уладзімір Караткевіч, 90-годдзе з дня нараджэння якога ў гэтыя дні адзначае ўся краіна. Прысвячэнне нашаму знакамітаму земляку прагучала таксама і ў конкурсных работах «Уладзімір Караткевіч і Віцебск», падрыхтаванай супрацоўнікамі бібліятэкі-філіяла № 14 імя У. Караткевіча г. Віцебска, і «Праўдзівы майстра, чысты, як сляза», створанай калектывам дзіцячай бібліятэкі імя У. Караткевіча Аршанскай цэнтралізаванай бібліятэчнай сістэмы. У вершах Уладзіміра Караткевіча, якія прачытала загадчык аддзела краязнаўчай літаратуры і бібліяграфіі Ларыса Рагачова, і відэакліпе «Мокрыя травы» на песню ў выкананні Галіны і Барыса Вайханскіх гучала тэма любові да роднай зямлі, уласцівая ўсёй творчасці пісьменніка.
Пра свае ўражанні ад конкурсных работ расказала член журы конкурсу, галоўны спецыяліст галоўнага ўпраўлення ідэалагічнай работы і па справах моладзі Віцебскага аблвыканкама Святлана Дзядзінкіна. Прысутныя паглядзелі відэаролікі «...Твоим прекрасным именем, Лучеса» і «Витебск: территория АRТ-пространства», створаныя супрацоўнікамі Віцебскай абласной бібліятэкі.
Старшыня Віцебскай абласной арганізацыі Беларускага прафесійнага саюза работнікаў культуры, інфармацыі, спорту і турызму Алена Сабірава і дырэктар Віцебскай абласной бібліятэкі Таццяна Адамян павіншавалі пераможцаў конкурсу.
Работы пераможцаў конкурсу можна паглядзець на YouTube-канале Віцебскай абласной бібліятэкі.
