Творчая сустрэча з паэтам-гумарыстам Міхасём Мірановічам

Details

Створана 10.02.2020 10:15

6 лютага ў бібліятэцы прайшоў творчы вечар нашага земляка, паэта-гумарыста Міхася Мірановіча.

Міхась Канстанцінавіч нарадзіўся 18 лютага 1948 года ў в. Старына Ушацкага раёна. Закончыў Велікадолецкую сярэднюю школу, Львоўскі дзяржаўны ўніверсітэт. Па адукацыі – радыёфізік. Аўтар шматлікіх публікацый у раённым, абласным і рэспубліканскім перыядычным друку, пачынаючы з 1972 года, а таксама адзін з аўтараў шматлікіх калектыўных паэтычных зборнікаў. Першая кніга «Міранізмы» пабачыла свет у 2002 годзе. З таго часу ім выдадзены не адзіны дзясятак гумарыстычных зборнікаў. Лаўрэат літаратурнай прэміі імя Кандрата Крапівы.

Сваё выступленне Міхась Канстанцінавіч падзяліў на 5 блокаў. Гэта вершы, літаратурныя пародыі, гумарыстычная проза, пераклады з польскай і ўкраінскай моў, а таксама блок пад назвай «Мая геаграфія», дзе пісьменнік прадэманстраваў творы, напісаныя падчас вандровак. У выкананні аўтара прагучала вялікая колькасць гумарыстычных твораў, якія з задавальненнем слухалі ўсе прысутныя.

Са словамі ўдзячнасці і пажаданнямі творчага плёну, выдання новых кніг выступілі журналіст, пісьменнік Міхаіл Конан, старшыня Віцебскага абласнога аддзялення Саюза беларускіх пісьменнікаў Анастасія Лазебная, паэтэса Галіна Сінякова.

З выданнямі Міхася Мірановіча і артыкуламі, прысвечанымі яго творчасці, удзельнікі сустрэчы маглі пазнаёміцца на кніжнай выставе.