ІII Міжнародная навукова-практычная канферэнцыя «Віцебскі край»

Details

Створана 27.11.2017 06:47

23 лістапада ў бібліятэцы прайшла ІII Міжнародная навукова-практычная канферэнцыя «Віцебскі край», прысвечаная 500-годдзю беларускага кнігадрукавання.

Арганізатарамі канферэнцыі выступілі Віцебская абласная бібліятэка імя У. І. Леніна, Віцебскі дзяржаўны універсітэт імя П. М. Машэрава, кафедра гісторыі Беларусі, Віцебскі абласны краязнаўчы музей.

У канферэнцыі прынялі ўдзел навукоўцы, гісторыкі, архівісты, краязнаўцы, прадстаўнікі духавенства, музейныя работнікі, выкладчыкі з Беларусі і Латвіі.

Падчас канферэнцыі Віцебская вобласць атрымала ў дар унікальнае факсімільнае выданне «Кніжная спадчына Францыска Скарыны», якое налічвае 20 тамоў.

Намеснік дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша перадаў каштоўны падарунак начальніку галоўнага ўпраўлення ідэалагічнай работы, культуры і па справах моладзі Віцебскага аблвыканкама Генадзю Ягораву.

Акрамя гэтага, асобныя экзэмпляры выданняў першадрукара атрымалі прадстаўнікі бібліятэк і навучальных устаноў горада і вобласці.

Аляксандр Суша расказаў аб праекце, адзначыўшы пры гэтым, што Скарына для беларускай культуры – каласальная асоба, чалавек, які прадвызначыў ход развіцця культуры, які данёс веды да нашчадкаў. Першадрукар пакінуў па-сапраўднаму багатую спадчыну, якую ў поўнай меры мы пакуль не можам сабе ўявіць.

Шматтомнае факсімільнае выданне ўяўляе поўны збор кніг, надрукаваных Францыскам Скарынам у Празе і Вільні. У яго аснову пакладзены электронныя копіі кніг першадрукара, якія захоўваюцца ў бібліятэках і музеях Беларусі, Расіі, Украіны, Германіі і іншых краін.

Факсімільнае выданне з максімальнай паўнатой узнаўляе кнігі Францыска Скарыны. Усе выданні суправаджаюцца каментарамі навукоўцаў, а таксама перакладамі прадмоў і пасляслоўяў Францыска Скарыны на сучасныя беларускую, рускую і англійскую мовы. Факсіміле пазнаёміць шырокую грамадскасць з адным з найбольш каштоўных скарбаў кніжнай культуры Беларусі.

Праект па факсімільным ўзнаўленні поўнага збору кніг Ф. Скарыны быў ініцыяваны і рэалізаваны Нацыянальнай бібліятэкай Беларусі і банкам «БелВЭБ».

На працягу канферэнцыі працавалі чатыры секцыі: «Гістарычнае краязнаўства», «Культурна-асветныя ўстановы і ўстановы адукацыі ў сістэме сучаснага краязнаўства», «Рэлігійнае краязнаўства», «Літаратурнае краязнаўства. Этнаграфія. Фальклор ».

Цэнтральнай тэмай большасці сустрэч, што адбыліся ў час работы канферэнцыі, стала вывучэнне і захаванне гістарычнай і дакументальнай спадчыны, абуджэнне ўвагі грамадскасці да гісторыі роднага краю.

У працэсе работы канферэнцыі раскрыты новыя старонкі гісторыі Віцебшчыны, вывучаны шырокі пласт архіўных дакументаў, у тым ліку з сямейных архіваў, дадзены аналіз знойдзеных матэрыялаў.

Былі прадстаўлены новыя матэрыялы пра гісторыю населеных пунктаў вобласці, гісторыі помнікаў культуры і мастацтва, аб цікавых кутках малой радзімы, пра людзей, якія праславілі свой край.

Па выніках канферэнцыі плануецца выданне трэцяга тома штогодніка «Віцебскі край». Першыя два выйшлі раней і былі прысвечаны 170-годдзю мясцовага краязнаўцы Мікалая Нікіфароўскага і 385-годдзю выхаду ў свет «Буквара» Спірыдона Собаля.