Бясплатныя курсы «Віцебск: рэальная і папулярная гісторыя роднага горада» «Віцебск як адміністрацыйны цэнтр Расійскай імперыі»

Details

Створана 27.02.2017 12:17

23 лютага ў бібліятэцы адбыўся чарговы занятак курсаў «Віцебск: рэальная і папулярная гісторыя роднага горада» на тэму «Віцебск як адміністрацыйны цэнтр Расійскай імперыі». На працягу XVII–XVIII стст. Віцебск не аднойчы станавіўся цэнтрам крывавага супрацьстаяння ВКЛ і Расіі, уніятаў і праваслаўных. Горад зведаў пажары і разбурэнні.

Лекцыя пачалася з выступлення галоўнага спецыяліста галоўнага ўпраўлення ідэалагічнай работы, культуры і па справах моладзі Віцебскага аблвыканкама, кандыдата гістарычных навук Дзяніса Юрчака. Ён распавёў пра ўтварэнне і далейшае развіццё Віцебскага ваяводства, пра яго становішча ў часы падзелаў Рэчы Паспалітай. Дзяніс Валер'евіч узгадаў, што падчас першага падзелу Рэчы Паспалітай амаль уся тэрыторыя Віцебскага ваяводства адышла да Расіі і апынулася ў складзе Пскоўскай губерніі (у складзе Рэчы Паспалітай засталася частка Аршанскага павета). У далейшым адбылося некалькі адміністрацыйных пераўтварэнняў, перш чым у 1802 годзе ў складзе Беларускага генерал-губернатарства былі створаны дзве губерніі – Віцебская і Магілёўская. Цэнтрам губернатарства стаў Віцебск. Падчас лекцыі былі таксама разгледжаны асноўныя асаблівасці, якія вылучалі Віцебск як адміністрацыйны цэнтр.

Віцебская губернія складалася з 12 паветаў. За час існавання губерніі на пасту губернатара змянілася 36 чалавек. Усе яны ўнеслі пэўны ўклад у развіццё Віцебска, адзначыліся пэўнымі дасягненнямі. Пра жыццё і дзейнасць віцебскіх губернатараў распавяла гісторык і краязнаўца Іна Аляксандраўна Абрамава.

З літаратурай, рэкамендаванай для больш глыбокага вывучэння тэмы, можна пазнаёміцца ў аддзеле краязнаўчай літаратуры і бібліяграфіі. Матэрыялы лекцыі размяшчаюцца на сайце Віцебскай абласной бібліятэкі і на старонцы «ВКонтакте».