Абласны семінар бібліёграфаў гарадскіх і раённых сетак публічных бібліятэк Віцебскай вобласці

Details

Створана 20.06.2016 10:16

16–17 чэрвеня ў бібліятэцы адбыўся двухдзённы абласны семінар для бібліёграфаў аддзелаў абслугоўвання і інфармацыі цэнтральных гарадскіх і раённых сетак публічных бібліятэк на тэму «Бібліяграфічныя рэсурсы, прадукты і паслугі: пытанні фарміравання і выкарыстання».

У ходзе работы семінара абмяркоўваліся пытанні тэорыі і практыкі прымянення стандартызацыі ў галіне бібліятэчна-бібліяграфічных працэсаў, патрабаванні да фарміравання аналітычнага бібліяграфічнага апісання, падрыхтоўкі бібліяграфічных рэсурсаў у электронным фармаце, выдання і афармлення дапаможнікаў. Асаблівая ўвага была нададзена вынікам інфармацыйна-бібліяграфічнай дзейнасці ў 2015 годзе, а таксама ўдасканаленню бібліяграфічнай складаючай вэб-сайтаў публічных бібліятэк Віцебскай вобласці.

Бібліёграфы прынялі ўдзел у відэаканферэнцыі з супрацоўнікамі Магілёўскай абласной бібліятэкі імя У. І. Леніна, дзе вопытам работы па стварэнні электронных краязнаўчых інфармацыйных рэсурсаў падзялілася вядучы рэдактар аддзела маркетынгу і бібліятэказнаўчай работы Юлія Аляксандраўна Касцюк, распавёўшы аб праектах «Таленты ад роднай зямлі», «Пысінскія чытанні», электронных выданнях бібліятэкі. У сваю чаргу, загадчык аддзела краязнаўчай работы і бібліяграфіі Віцебскай абласной бібліятэкі Ларыса Іванаўна Рагачова прэзентавала сумесны карпаратыўны праект «Беларускія смаляне – смаленскія беларусы», ініцыіраваны супрацоўнікамі Смаленскага дзяржаўнага ўніверсітэта.

Работу круглага стала «Трансфармацыя бібліяграфічных прадуктаў і паслуг публічных бібліятэк у інфармацыйным грамадстве» дапоўнілі выступленні супрацоўнікаў публічных бібліятэк Віцебскай вобласці. Загадчык аддзела інфармацыйна-бібліяграфічнай работы ЦГБ імя М. Горкага ДУК «Цэнтралізаваная бібліятэчная сістэма г. Віцебска» Вольга Леанідаўна Букіна зрабіла акцэнт на бібліяграфічных выданнях па прасоўванні кнігі і чытання, а загадчык даведачна-інфармацыйнага аддзела ЦРБ імя Ф. Скарыны ДУК «Полацкая раённая цэнтралізаваная бібліятэчная сістэма» Людміла Барысаўна Дзядзюліна расказала пра навукова-пошукавую работу, накіраваную на садзейнічанне захаванню гістарычнай спадчыны Полацкага рэгіёна.

Павышэнню кваліфікацыі бібліёграфаў спрыялі знаёмства з дзейнасцю бібліятэк Віцебскага дзяржаўнага ўніверсітэта імя П. М. Машэрава і Віцебскага дзяржаўнага ордэна Дружбы народаў медыцынскага ўніверсітэта, індывідуальная кансультацыйная работа ў рамках практычных заняткаў па вывучэнні інфармацыйна-бібліяграфічных рэсурсаў.

Удзельнікі семінара азнаёміліся з выставай прафесійнай літаратуры «Бібліяграфія ў інфармацыйнай прасторы», а таксама выставай-праглядам бібліяграфічнай прадукцыі публічных бібліятэк Віцебскай вобласці.